BJKC: Lëtzebuerg setzt sech géint Malta duerch
BJKC: Lëtzebuerg setzt sech géint Malta duerch
An der éischter Renconter an de Placéierungsspiller fir d'Plaze véier bis sechs vun der Europa Grupp III konnt sech d'SEAT Lëtzebuerg Billie Jean King Cup Ekipp en Donneschdeg zu Chisinau a Moldawien eng 2:1-Victoire géint Malta sécheren. D'Laura Palumbo huet sech am Eenzel an engem gudde Match dem Elaine Genovese, enger erfuerener Géignerin, misse mat 4:6, 4:6 geschloe ginn. Am zweeten Simpel huet d'Eléonora Molinaro taktesch iwwerzeegt a konnt duerch eng 7:5, 6:2-Victoire géint d'Emma Montebello ausgläichen.
Beim Stand vun 1:1 koum et dunn zum entscheedenden Dubbel. Hei konnten d'Lucie Rabiot an d'Eléonora Molinaro iwwerzeegen. D'FLT-Spillerinnen hunn hire Géignerinnen aus Malta keng Chance gelooss a sech mat 6:4 a 6:2 géint den Duo Genovese/Montebello duerchgesat. Domadder hu si Lëtzebuerg an der Course gehal, fir e Samschdeg géint Irland ëmm déi véiert Plaz ze spillen. E Freideg ass d'SEAT Lëtzebuerg Billie Jean King Cup Team spillfräi.
Weider Informatiounen an d'Resultater sinn op der Säit vum Billie Jean King Cup ze fannen.
